Vertu ekki feiminn áhorfandi...
komdu og slástu í hóp með okkur!
Eftir Glenn McWilliams 

   Þegar ég var í gagnfræðaskóla stjórnaði ég, spilaði í og marséraði með þrjú hundruð manna lúðrasveit. Sveitin okkar í gagnfræðaskólanum var kölluð „Fighting Highlanders“ (Baráttuglaðir Hálendingar). Við fylgdum hinni svokölluðu skosku hefð, vorum með sekkjapípuleikara, trumbuslátt, sverðdansara og klæddumst búningum svo við litum út eins og verðir í Buckingham höllinni, og það sem mikilvægast er – við vorum í skotapilsum! Á lokaári mínu tók Don Huckle við sem tónlistarstjórnandi yfir deildinni. Hann átti bakgrunn í gönguskipun flokka með tommur og herlúðra. Það var ekki auðvelt að fá þrjú hundruð manns til að hreyfa sig og spila í fullkomnum takti hver við annan. Trumbuslátturinn var lykillinn. Það var undir slagverkshópnum komið að hafa taktinn í lagi. Slagverkshlutinn var með fjölmörg mynstur og takta í gangi í einu sem varð að taktföstum hjartslætti sem hreyfði líkamann í takti og samhljómi. Þegar við höfðum fengið alla til að hreyfa sig í takt við sama trommuleikarann var unun á að horfa. Það er eitthvað mjög sérstakt við það að fylgjast með hópi fólks sem hreyfir sig í sama takti, eins og það væri einn risastór líkami.

   YHWH hefur kallað Ísraelsbörn til þess að vera einn líkami sem gengur í takti við hann. Þess vegna hefur hann blessað okkur með Torah til þess að hjálpa hinum ýmsu limum líkamans að hreyfa sig á yndislegan hátt sem einn líkami. Það er ákveðinn taktur sem fylgir því að halda Torah. Í raun má segja að Torah sé eins og hljóðfall sem samanstendur af fjölmörgum slögum sem saman verða að einum mögnuðum hjartslætti.

   Fyrst er hinn daglegi taktur Tamid eða hinnar stöðugu fórnar. Á morgnana og á kvöldin áttu Ísraelsbörn að fórna lömbum og reykelsi á altarinu sem fórn til YHWH. Síðan er hinn vikulegi taktur sex vinnudaga sem er rofinn með sabbatinum eða hvíldardeginum. Næst er mánaðarlegi takturinn þar sem fylgst er með nýju tungli og byrjun nýs mánaðar er fagnað. Þessu er svo fylgt eftir með hinum árlega takti ákvörðuðu æfinga, vor- og hausthátíða YHWH. Þar á eftir er sjö ára taktur Shemittah eða lausnarársins þegar allt land Ísraels hvílist og hebreskir þrælar eru leystir. Að lokum eins og „umpah umpah“ túbunnar kemur fimmtíu ára taktur fagnaðarársins þegar allt Ísrael er endurreist, skuldum aflétt og eignum skilað.

   Í gegnum tíðina hafa farísear og rabbínar Ísraels bætt við og tekið burt takt og takt úr Torah og búið til sinn eigin undarlega vals. Með því að hlusta á ráðandi takta rabbína hefur stór hluti Ísraels gengið og dansað úr takti við YHWH.

   Árið 1998 þegar Michael Rood endur-kynnti hið „stjarnfræðilega og jarðyrkjulega leiðrétta biblíulega hebreska dagatal“  hristi það verulega upp í hinni messíönsku hreyfingu. Messíanska hreyfingin dansaði hamingjusöm valsinn með rabbínunum þegar Michael Rood réðist inná dansgólfið og barði ævafornan frumtakt: Takt Torah.  En hægt og rólega gerðist það á næstu árum að sífellt fleiri trúaðir tóku að dansa, að minnsta kosti að hluta til, við þennan nýja takt. Smám saman, einn líkamshluta í einu, hefur líkami Messíasar verið að ná upp taktinum og dansað rólega í takti við Torah.

   Það þarf engan Dick Clark eða dómara úr „Dansað við stjörnurnar“ til þess að sjá að hin messíanska hreyfing er engan veginn þokkalegur líkami sem hreyfist í fullkomnum takti. Eitt vandamálið er sú staðreynd að jafnvel þeir trúuðu einstaklingar sem fylgja hinu biblíulega dagatali með öðrum fæti dansa enn valsinn við rabbínana með hinum fætinum. Ég efast um að þetta sé það sem Yeshua hafði í huga þegar hann sagði við lærisveinana: „Láttu ekki vinstri hönd þína vita hvað sú hægri gjörir“ (ensk þýð). Þó að margir hafi fylgt hinu biblíulega dagatali fyrir hvíldardaga, tunglkomudaga og hátíðir YHWH, hefur Torah hringurinn verið fastur í hinum gamla rabbínska takti Babýlons. Á hverju ári eru sífellt fleiri messíanskir trúaðir einstaklingar sem hafa farið yfir í það að fagna Rosh Hashanah eða nýja árinu að vori til þegar glittir í nýtt tungl og þegar lýst hefur verið yfir að byggið í Ísrael sé orðið aviv. En síðan fara þessir sömu trúuðu einstaklingar aftur yfir í gamla rabbínska valsinn þar sem Torah skammturinn hefst í sjöunda mánuðinum, í samræmi við nýárshátíð rabbínanna á haustin.

   Eftir að hafa staulast um dansgólfið eins og beljur á svelli, erum við loksins tilbúin til að taka stökkið, hoppið, hringsnúninginn, cha-cha-chaið, hip-hoppið, break dansinn, messíanskan mambó eða hverja þá hreyfingu sem nauðsynleg er til þess að fá okkur öll í takt við Torah.

   Við höfum byrjað að endurreisa þriggja ára Torah lestraráætlun sem Yeshua fylgdi þegar hann bjó í Ísrael. Áður en rabbínarnir í Babýlon breyttu dagatalinu og Torah lestrinum í hina nútímalegu árlegu lestraráætlun, fylgdu Ísraelsbörn þriggja ára lestrarkerfinu. Þetta þýðir að það mun taka þrjú ár að lesa og rannsaka Torah. Þetta þýðir einnig að í stað þess að líta lauslega yfir höfuðatriði fjögurra til sex kafla í hverri viku, köfum við nú dýpra og gæðum okkur á einum eða tveimur dýrindisköflum í einu. Með því að rannsaka minni skammta í Torah í hverri viku höfum við tíma til að rannsaka, fjalla um og innleiða Torah í líf okkar með meiri skilningi. Með því að byrja Torahlesturinn á fyrsta hvíldardegi nýss árs, sem samkvæmt Biblíunni er að vori til en ekki á haustin, munum við færa fleira í lífi okkar í takt við Torah og hið spádómlega biblíulega dagatal YHWH.

   Slástu í hóp með okkur í þessum dásamlega taktbundna dansi við skapara og endurlausnara alheimsins. Á hverjum hvíldardegi muntu sjá Torah skammtinn á vefsíðu okkar, og í hverri viku getur þú nálgast vikulegan lestur og myndband með kennslu vikunnar. Við munum gefa út dvd diska og ritað efni til dreifingar til hópa og einstaklinga þegar okkur miðar áfram í þessu þriggja ára ævintýri þar sem við köfum í lifandi Torah. Þetta verður ekki þurr tugga af skoðunum látinna rabbína, heldur ferðalag dýptar þar sem við komumst að því hvað heilagur andi er að tala til okkar á þessum tímum endurreisnar. Smám saman, skref fyrir skref er YHWH að opinbera takt sinn. Það er von okkar að þú finnir taktinn og sameinist okkur í þessum dásamlega Torah dansi.

Birt með leyfi höfundar.
Íslensk þýðing: VV

torah@internet.is